पहाटे पहाटे अस्मादिक उठायचे ,
आवं दुधाचा ग्लास रिचवायचे .
गरम गरम गाकर
अन डाळ फळ्या वरण
त्यावर सुगंधी तूप
अहाहा ....
जगात इतकं भारी किचन सापडणार नाही !
चुलीवरच्या गाकराची घ्या ,
का भाकराची घ्या ,
काळ्या भांड्यातल्या डाळ फळ्या वरणाची घ्या
चव सेवन स्टार हॉटेलच्या शेफ ला
ती "चव ' साधणार नाही !
कारण ओतप्रोत प्रेम ओतलेले
ते पदार्थ , आपल्या नाता ला खाऊ घालणारा तो शेफ
जर नातोबाचा आजा असेल तर
"राजे ' पण या परती मिळणार नाही !!!
आणि असे भाग्य तुमच्या नशिबी असल तर ....
आम्ही हे भाग्य मिळवले
अण्णा आजोबांनी ते वाटले
अगस्ती राजेंना जरा जास्तच !
किरकिरा , कुरकुरा असू देत ना
बेबीचं पोर होतं ती पण लाडाचीच !
अण्णा आजोबा फार लवकर गेले ,
पण मी नशिबानं नातू म्हणून
खूप हिस्सा मिळवला !
बाबीताई नंतर मीच .
अण्णा आजोबा कसे होते
म्हटलं तर
रागीट होते असे सगळे म्हणतील
पण माझ्या साठी नाही !!
आजही बाहेर दिवाणखान्यात
सिलिंग फॅन खाली दिवानावर
तक्क्याला रेलून तळ पाय मांडीवर ठेवून
पलीकडे सोफ्यावर मी
अन अण्णाआजोबा चर्चा राजकारणावर !!
मला नाही वाटत अण्णा आजोबा ह्या विषयावर
कुणा पोराशी ,नाताशी बोलले असतील ,
कदाचित दादामामाशी झाली असेल क्वचित .
हे डेअरिंग " नातू'च करू शकतो
बऱ्याच विषयांवर चर्चा
मोकळ्या मनाने मी भाऊं सोबत करू शकत नव्हतो .
पण अण्णाआजोबा नो प्रॉब्लेम !
आज अण्णा आजोबांचा शताब्दीवस !
मला एक समृद्ध आजोबा मिळाले ,
समाजात एक प्रतिष्ठा असलेले आजोबा लाभले
गावात ज्यांच्या शब्दाला मान होता
ज्यांचा पंचक्रोशीत दबदबा होता ,
असे आजोबा लाभले ,
आपल्या कृतीतून संस्कारित करणारे आजोबा लाभले ,
"खोलापूरकर दत्तोपंत पांडे माझे आजोबा '
सांगताना छाती 56 इंची बनावी
असे आजोबा लाभले ...
सासर माहेरच्या दूरदूरच्या नात्यांचा "आसरा' बनलेले
आजोबा लाभले ,
उत्तुंग व्यक्तिमत्व आजोबा म्हणून लाभले
भाग्य आमचे !!!
अण्णा आजोबांना जन्म शताब्दी निमित्त
अभिवादन .
अगस्ती
No comments:
Post a Comment