सुधाकाका @88 !
डॉ सुधाकर रे.शास्त्री …
एव्हाना डॉक्टर ते आहेत हे बहुतांश सर्व नातेवाईक विसरले असावे अगदी स्वत: सुधाकाकांसकट !!
मुक्या प्राण्यांवर न बोलता ट्रीटमेंट करणारे डॉक्टर बोलक्यांना हळूच हवेहवेसे कसे नकळत करून घेतात , काय गूढ रसायन आहे या माणसात कळत नाही !
इंग्रजी पार्थ पासून देशी पार्थापर्यंत सगळ्यांना पट्ट्यापट्याच्या चड्डीवरील ‘एक हडकुळा ‘ आमचा काका,कुणाचा बावा, कुणाचा आजोबा आणि ….खरेतर आजच्या भौतिक सुखाच्या मागे असणाऱ्या जगात, वयानुरूप “डस्टबीन’च्या संबोधनात ज्यांची हेटाळणी सहज अपेक्षित आहे …. अशा कुणाच्या मामंजीच्या भूमिकेत असणाऱ्या या काकांनी कुठले फेविकोल पिले असावे की सगळे यांच्या घोळक्यात चिपकून राहतात …
…. यांनी केलेले वरण वाट्यांनी ओरपतात, घरीच सगळे उभे आडवे मिळेल त्या जागेत यांच्या सभोवती असतात ! अगदी नकोनकोश्यांना सुद्धा हे हवेहवेसे कसे होऊ शकतात बरं ! यांचं रासायनिक पृथक्करण व्हायला पाहिजे नक्कीच !
सुधा काकांच फिजिक मला आठवत तेव्हापासून काहीच बदलेलं नाही ।जसं च्या तस…. तेच ओबडधोबड, वजनात ग्रॅमचाही फरक येणार नाही याची काळजी घेत माझ्या शब्दात “चिवडचावड ‘ करत पोटात ढकलेलं अन्न यांच्या अंगी कधी लागलेच नाही …. नसता अस्मादिक दर आठवड्याला ? दिवसाला म्हणा किंवा प्रत्येक वेळी वजन घेताना किलोकिलोनच वाढलेले !!!
यांच्या कडून बाहेर पार्टी घेण्याच्या नादात यांच्ये कैक मित्र धारातीर्थी पडले असतील आमची काय बिशाद … घरी या अगतस्वागत,अगत्याने नुसत्या उकरपेंडीच्या अन घरच्याच कांद्या पोह्याने ह्या माणसाने किती मोठं गोत तयार केलय .. आम्ही विस्मित आहोत …
सुधा काका तस पाहिलं तर माझा लहाना काका खरतर आमचं नातं अरे तुरे चे… मात्र शास्त्री परिवाराच्या रिवाजा नुसार ते दूर गेलेलं… अहो जाहो किंवा “तुम्ही आम्ही ‘ वर ! परंतु सुधा काकानी दूर जाऊ दिले नाही ..आई भाऊंच्या जलद बाजीने लवकरच्या एग्जिट ने आम्हाला त्यांच्या रिकाम्या जागा भरायच्याच होत्या आम्ही नशीबवान… अनेक उत्तरं मिळाली त्यात सुधा काकानी उत्तर समृद्ध केले. भाऊंचा सुध्या , विसराळू सुध्या … आमची नावं लक्षात ठेवता झाला… मायेन प्रेमाने आम्हाला समृद्धी दिली.आम्ही
प्रभ्याची लेकरं पोरके झालो नाही आणि खात्री आहे सुध्या अजून आमच्या एग्जिट (प्रशांतच्या भाषेत) पर्यंत पोरकं करणार नाही ….
काका आपल्या दीर्घायुष्या साठी रेणुकेचरणी प्रार्थना
अगस्ती
