एकदा ईश्वराकडे मागणं. .
तुझा सहवास दीर्घकाळ हवाय!
त्यानं गुरु कडे बोट दाखवलं
गुरूंच्या जवळ रहा
माझ्यापर्यंतचा मार्ग तिकडेच आहे
“माझ्यापर्यंत पोहोचायचंय?
मग गुरु हीच वाट आहे.”
गुरु म्हणजे प्रकाशाचा स्रोत,
अज्ञानाचा नाश करणारा.
गुरु म्हणजेच ब्रह्मस्वरूप –
ईश्वराच्या साक्षात दर्शनाची पहिली पायरी.
गुरु जवळ रहा, गुरूंची सेवा कर !!
गुरु सेवेचं ठरवलं....
जास्तीत जास्त सहवासाचंही
भाग्य लागतं !!
“अमृतायुषी भाग्य ‘
देवानं ऐकलं दादांना धाडलं!
दादा
आमचे पाहिले गुरु
निर्लोभ, निःस्वार्थ,निःस्पृह,निर्मोही
सचोटी सत्यनिष्ठा सदाचरण
सगळं कसं भरभरून दिलंत. .
आमची ओंजळ तुडुंब...
शिस्त, सेवाभाव, नि प्रेमाची गाथा...
तुमचं आयुष्य म्हणजे जगण्याची दिशा।
दादा
तुमच्या हातात संस्कारांची वीण,
प्रामाणिकतेचीच वाजविली बीन ।
सामाजिक कार्यांची भक्कम शिडी,
तुम्ही उभारली नितिनिष्ठ गढी ।
आता इतकंच मागणं पुन्हा. ..
दादांच्या आशीर्वादाची तिजोरी
रीती होऊच नये कधी. ..
दादा
संपूच नये सुरूच रहावा
तुमचाआमचा प्रवास,
प्रेरणादायी, शांत, दीर्घ
नि ध्यासयुक्त श्वास।
“अमृतायुषी शुभकामना ”
(९८व्या वाढदिवसानिमित्त)
अलका प्रमोद अर्चना
No comments:
Post a Comment